Maayong balita sa mga empleyado sa gobyerno nga hangtud karon wala pa nahimong regular o permanente ang status. Gibutyag ni Partido Federal ng Pilipinas (PFP) standard bearer ug presidential frontrunner Ferdinand ‘Bongbong’ Marcos, Jr., nga panahon na aron hatagan og atensyon ang mga trabahante sa gobyerno nga hangtud karon wala pa gihapon ma-regular sa trabaho bisan kung kwalipikado.
Matud ni Marcos, nabati niini ang kalisod sa tanang mga Pinoy ug daghang mga trabahante nga dugay nang nagserbisyo sa gobyerno ang hangtud karon nagpabiling contract of service o ba kaha job-order workers.
“Dunay 180 tawsan ka bakanteng plantillas busa unahon nato nga punoon ug ayuhon dayun silang mga JO workers sa national ug LGUs atong paningkamotan nga ma-regular basi sa pondo sa gobyerno ug kung unsay nakalatid sa balaod,” dugang pa ni Marcos.
Sa kasamtangan, daghang mga job order workers sa gobyerno ilabina ang mga naa sa local government units nga ga-sweldo lang sa 10 tawsan matag bulan.
Sobra kini ka ubos kung ikumpara sa minimum wage sa mga naa sa pribadong sektor nga 537 pesos kada adlaw o ga-sweldoh og 13,962 matag bulan.
“Ang ato man ganing minimum wage ubos na kaayo, unya naa pa man diay mas ubos ana ug ang naka-grabe kay kadto pa hinoong ga-serbisyo sa gobyerno,” gibutyag ni Marcos. “Halos dili nako mahuna-hunaan kung giunsa kini pag-antos sa atong mga JO workers.
Ato nang tarungon aron malipay sad tawun ang ilang pamilya,” gawas niini, ang mga trabahanteng casual ug job-order way labot kadtong mas ubos pa gyud ang sweldo mao pay dili makadawat og benepisyo sama sa mga Christmas bonus ug 13th month pay nga gakakuha sa mga regular o permanenteng empleyado.
Tungod niini, gibutyag ni Marcos nga dili lamang sa pribadong sektor dunay dakong problema sa kontraktwalisasyon, kung dili dugay na usab kining problema bisan sa gobyerno tungod kay kadaghanan kanila mga job order o contract of service lamang.
Sa kasamtangan, mokabat sa 600 tawsan hangtud 700 tawsan job-order workers ang naa sa gobyerno. Naa sa 180 tawsan usab ang ibutang nato sa ‘unfilled plantilla positions.’
Usa sa hinungdan nganung dili ma-regular ang pipila ka JO worker tungod sa kakulang sa kwalipikasyon, partikular na ang eligibility gikan sa Civil Service Commission (CSC).
Kung si Marcos ang pangutan-on, gusto niining mopasa og balaudnon nga mahatagan og higayon ang mga empleyado nga consistent nga nakakuha og ‘outstanding performance ratings’ sulod sa tulo ka tuig, aron ma-promote ug mahimong regular.
“Kung maayo usab ang ilang rekord sa trabaho ug consistent ang outstanding performance ratings, basin pwede na silang himoong regular bisan kung walay civil service eligibility,” matud ni Marcos.
“Dili sakto nga nag-serbisyo ang mga empleyado nga contractual, job order o moa (memorandum of agreement) workers sa taas nga panahon nga walay employer-employee relationship.
Sakit sad para sa ilaha kay wala man lang silay madwat nga benepisyo busa angay lang nga ihatag nato kung unsay dapat, ilabina ang ilang dignidad,” saysay pa ni Marcos.
Dugang pahayag niini nga ang mga government workers ang frontliners sa gobyerno– duna may pandemya o wala busa kung swertehon nga makadaog sa Mayo 9 nga eleksyon, paningkamotan niyang ma-regular sa trabaho ang liboan ka mga JO workers sa gobyerno.
DAVAO BREAKING NEWS 