SA menos tulo nalang ka semana sa dili pa ang Mayo 9 nga eleksyon, ang presidential frontrunner nga si Ferdinand ‘Bongbong’ Marcos padayong naghari sa tanan niyang mga kaatbang sa matag nationwide scientific surveys nga gihimo sa tanang respetado nga polling firms sa nasud.
Base sa April 2-6 OCTA Research Tugon ng Masa survey nga gipagawas niadtong Domingo, si Marcos nakakuha og 57 porsyento nga preference votes gikan sa 1, 200 ka respondents.
Nisaka pa si Marcos og duha ka porsyento nga puntos kumpara sa iyang 55 porsyento nga gusto sa mga botante niadtong Pebrero 2022.
Ang OCTA Research wala magpagawas sa ilang Marso nga survey nga nag-ingon nga kini pribado nga kamandoan sa usa ka pribadong kompanya.
Si Leni Robredo naulahi gihapon og 22 porsyento, Isko Moreno nga 9 porsyento, Manny Pacquiao, 7 porsyento; ug Ping Lacson, 4 porsyento.

Ang Partido Federal ng Pilipinas (PFP standard-bearer) nagpabilin usab sa iyang pagpanguna sa National Capital Region (NCR) nga adunay 35 porsyento, 66 porsyento sa Balance Luzon, 56 porsyento sa Visayas ug 50 porsyento sa Mindanao.
Si Marcos mao sab ang top choice sa Class ABC nga adunay 52 porsyento; 59 porsyento sa Class D, ug 44 porsyento sa Class E.
Sa grupo sa edad, si Marcos nakakuha sa labing taas nga marka gikan sa 18-24 anyos nga adunay 77 porsyento; 25-34 anyos nga adunay 62 porsyento; 35-44 anyos, 46 porsyento; 45-54 anyos, 50 porsyento; 55-64 anyos, 54 porsyento; 65-74 anyos, 53 porsyento; ug 75 ug pataas, 36 porsyento.
Sa nakagawas nga survey niadtong Marso sa Social Wether Station (SWS), nakita sab nga runaway winner si Marcos human nisaka og otso porsyento ang iyang voter preference gikan sa miaging survey.
Naka-iskor siya og 58 porsyento nga gusto sa mga botante kaniadtong Marso 2022 nga survey, nga misaka pag-ayo sa walo ka porsyento kung itandi sa iyang 50 porsyento nga rating sa survey kaniadtong Enero.
Sama sa naandan, ang labing layo nga nagsunod sa ikaduha nga pwesto mao si Leni Robredo nga adunay 18 porsyento nga gusto sa mga botante kaniadtong Marso o mikunhod sa usa ka porsyento kung itandi sa iyang 19 porsyento nga gusto sa botante kaniadtong Enero.
Namatikdan usab nga padayong nisaka ang gidaghanon ni Marcos samtang nagkaduol ang piniliay.

Sa Oktubre 2021 nga SWS survey, si Marcos nakakuha og 47 porsyento, samtang niadtong Disyembre 2021 misaka ngadto sa 51 porsyento.
Sa miaging Enero, nakakuha siya og 50 porsyento sa wala pa nakapuntos og 58 porsyento karong Marso.
Samtang, si Robredo nagpabilin nga ubos sa 20 porsyento sa SWS survey sukad niadtong Oktubre 2021.
Naka-iskor siya og 18 porsyento niadtong Oktubre 2021, 14 porsyento niadtong Disyembre, ug 19 porsyento niadtong Enero unya mibalik sa 18 porsyento karong Marso.
Sa sayo pa, ang survey sa Pulse Asia mideklarar nga si Marcos mahimong labing unang “majority president” sa nasud ubos sa multi-party setup, human namentinar ang iyang dakong labaw batok sa iyang kaatbang.
Base sa resulta sa pre-election polls sa Pulse Asia nga gipagawas niadtong Marso, nagpabiling dakong lider si Marcos sa presidential derby, nga nakakuha og 56% nga voter preference.
Layo nga nagsunod sa ikaduha nga pwesto mao si Leni Robredo nga adunay 24% samtang si Isko Damagoso nakakuha og 8%.
Sa laing bahin, si Manny Pacquiao nahimutang sa ikaupat nga adunay 6%, samtang si Panfilo Lacson nakakuha og 2%.
Sa una nga pakighinabi sa SMNI, si Ana Tabunda, Research Director sa Pulse Asia, namahayag nga si Marcos nagpadayon sa pagdominar nga halos dili mabuntog nga labaw ug lisud kaayo alang kang Robredo ang pag-apas.
“Medyo lisod siya (si Robredo makaapas), kay nwebe puntos ang ulahi nga pagtaas ni Leni. Aron makaapas, nanginahanglan siya og 16 puntos unya si BBM kinahanglang pakunhuran og 16 puntos sa umaabot nga adlaw sa dili pa ang piniliay. Medyo lisod siya (mahitabo),” pasabot niini.
Mahimong mausab, ang pangutana kon makaapas pa ba. Dili man hinuon imposible pero medyo lisod kay 32 puntos ang gintang,” paghatag niini og gibug-aton. (PR)